SOUTH GUJARAT-A 2008 CHRISTMAS HMAN THU

Tukin zing dar 5:30 AM ah kan chhungkua in phur tak maiin South Gujarat Division a Christmas hmang tur a min sawmna lam pan a kan kal ni tur a nih avangin kan tho sap sap a, kan Driver hruai tur Mr. Sam Pawar pawh dar 6:15 AM ah Compound lo thleng pheiin, chabi te an rawn lam ve nghal bawka, tichuan thingpui te kan in zawhin In atangin kan chhuak tlaa, tawngtaina ka neih zawhin 6:40 AM ah kan kal tan taa, kan in atanga hla vak lovah Diesel kan thun khat te te a, chak lutuk lo, muang lutuk si lovin kan tlana, khua a thiangin, boruak a nuam tawk bawka, Alexa leh Sylviai pawh an pi hovin an ti ti nak nak a, kan hlim tan khawp mai. Wayside Restaurant ah Breakfast ei turin kan chhuk a, mi an tam bawka an service zung zung chungin kan nghak rei phiana, minute 40 lai kan chawla, tichuan chawl khawmuang tawh lovin kan tlan zar zara, kawng kam thingkung te an mawiin, tlangram mawi tak tak lo lang thin te chuan zin kawng a tinuamin, min ti hahdam khawp mai. Kan tlan tluang tha bawka, dar 1:35 PM ah chiah, Vansda DHQ kan thlenga, DC leh a thawhpui ho te leh Ray Hope House naupang 60 chuang lai maiten min lo hmuaka, pangpar thi te min awrh tir zawhin hun rei lo te ka hmanga kan thlenna tur DHQ Rest House ah kan inla lut taa, a nuam tan hle mai, dar 2:30 PM ah Chaw chhun puar takin kan ei a, a hlimawm tan hle mai.

Tlai dar 3:30PM ah Home naupangte nen Hall ah Christmas lawmna programme hmasa ber chu kan tan taa, DC, Major Gabriel I. Christian in hneh takin inkhawma hruaia, amah hi zai mi, music lam thiam ve tak mai a nia, Mumbai Corps lam ho zai ai chuan a tha fe mai. Major Indumati DDWM in min lo lawmna thu a sawia, a ni hi hmanni deuh tawh khan a hrisel loh thu leh Damdawiin a luh thu te kan lo hriaa, dam taka min lo lawm thei chu kan lawmna belhchhahtu a ni. Lt. Col. Kawli'n min lo lawmna te chu a chhanga, pangpar thi kan awrh leh ngheng mai, he Home a naupang awm te hi Adivasi hnam te an nia, tunah chuan a lian pawl te chu High School kal an ni tawhin, tleirawl an ni tawh hlawma, an hmel pawh a tha viau hlawm a, anmahni lam ho te chuan 'Tribal hnam' ti deuh ngatin an sawi kher thin.

Cultural Programme neih a nia, Major Dhiraj Macwan DYS leh a nupui, Maj. Sumitra ten an kaihruaia a hlimawm hle mai, kan bengluhna zual em em mai chu heng Adivasi hnam te hian CHERAW an lo kan ve reng mai tih han hmuh leh an kan lai han hmuh ngei mai hi a ni.
CHERAW KAN: Home a Hmeichhe tleirawl rual te chuan an hnam lam hrang hrangte min entir bakah, Cheraw an chhuan ve em em mai chu min entir taa, A hmasaberin tleirawl pahnihin mau tlawn sei tak, an mau khawnna hnuaia khawn chhan tur kha pakhat ve ve in a mau lai tak awm velah a khampheiin an rawn kenga, lam chungin zawl laiah an rawn kal phei pui a, lam pah zelin an cheraw kanna tur laiah chuan zei tak maiin, a inkar hlat dan tur chiah khan an rawn dah hmasa phawta, chutah tleirawl 12 in mau an khawn tur kha lam chungin an rawn chhuahpui leha, lam chung zel khan an khawn dan tur inkar hlat lam ang tur khan, nichina mi pahnihin mau tlawn an dah tawh chungah khan an han dah ve leh phawta, Mizo nula ten an tih ang chiah hian, an mau chu cheraw khawn pangngai ang khan an han khawng ta thap thap maia, tichuan a kan tu tur tleirawl 2 te an lo chhuaka, he first stage a an kan dan hi chu Mizo in cheraw kan kan dan nen danglamna pakhat mah a awm lo, kan chhungkua chuan hmuhnawm kan tih bakah min inti lamhnaitu ni hialin kan hria, cheraw kan te chu vawi tam lo hmu tawh thin mah ila, tuna mi zet chuh hmuhnawm kan ti zual bik a ang khawp mai.

A stage hnihna ah chuan a kan dan leh a cheraw khawn dan te chu la pangngai reng mahse, a kantute mit kha puanin an tuam phui ta tlat mai thunga, an kan pah khan khote ah hian pangpar nuai tilh hi an keng ve ve bawka, chu chu an cheraw kan pah khan an thingbaw pah bawka, an thiam hle mai, mit tuam tlat nimahse an kan sual chuang reng reng lo, keini Mizo te Cheraw kan ai hian an hmuhnawm zawk a, a chhan chu a kantu te hian zawi hnap hnap, inzo tak chung siin hmel hlim tak mai pu chungin an kan a, hei hian a ti mawi zual, hah hmel an pu tlat lo, kan entawnna lai tur tak pawh niin ka hria.
A stage thumnaah chuan a Kantute kha an lo dingawla, lam ti tih deuh chungin an lo dinga, a khawngtute ho kha mau chelh reng chungin an dinga, an mau ken kha rual takin sir khat a miteho khan an han keng hniam a,lehlamin an awm zawn velah an lo kenga, lehlam khan an han kensan veleh lehlamho khan an han keng hniam ve leha, heng an tih chhung pawh hian an tihniamin an tisang naran lova, insawi deuhva lam chung zelin an tia, a behbawm hi an ti thiam khawp mai.
A stage 4-na ah chuan a mau khawngtute lehlam lehlam a mi te khan an mau kha a insiin an kawng zawn vela sangah keng kawp theuhva, chu chu a kantu pakhat zawk kha chutia an ken kawp mauah chuan lawnin lam chung deuh hian a zawh chhuak leh vek a, a zawh chhuah hnuah chuan a zawhtu kha a chhuk a, mau kengtute khan an dar ah a kawp te te khan an pu leh theuhva, chu chu a kantu pakhat zawk khan lam chung bawka lawnin a zawh chhuak leh veka, a zawhchhuah hnu chuan leiah an dah thlaa, a tir a an tih dan ang chiahin a khawngtu te khan an mahni mau theuh kha a tung zawngin an kenga, music rualin an sawh rual leh thap thapa, muang changin a indawtin lamtual atang chuan an kal chhuak leh taa, a tan dan leh a tawp dan hi Mizote tan zirlai niin kan hria, Mizo ah chuan an kanna hmun turah midangin emaw hmanhmawh takin an va dah sawk sawka, an kan zova hmanhmawh takin an midangin emaw an va khawm leh chuk chuka, Adivasi ho hi chuan a kantuho te khan lam pahin an rawn rem fel veka, lam chung bawk khan mawi takin hnu an khar leha, an ti hmuhnawm thiam zawk niin kan ngai a ni.
Darkar 2 lai mai Cultural Programme kan neih hnu chuan kan bang a, hmanhmawh deuh hlekin thingpui kan ina, zan lam programme hmanna tur lam Corps te pan turin kan inbuatsaih leh nghjal taa.
Tlai dar 6:00 PM pelh hretin Christmas Programme hmanna hmasa tur AMBANAPADA CORPS lam pan turin kan in khalh chhuak leh taa, kawng lakah BORIACH CORPS a Sipaiten min lo hmuak ve tlat maia, an ni hi South Gujarat a Corps hmasaber, kum 1991 a din tawh kha an nia, kum 10 kal tawhah khan an Biakin chu Ringlo miten an hal chhiat sak veka, sak leh mai an remtih sak bawk si lova, tun thleng hian CSM In ah an la inkhawm zui ta tang tang zela, tun hnai mai khan a sual zual ho te an pemchhuak ta a, Biakin pawh sak leh theih a niin an sawia, mahse tanpuina kan nei mai thei si lova, puih dan awm se a duhawm hle mai, an niho hi kan programme tel loh vangin, an CSM in ' Rei lo te tal Mual inkhawm min neihpui rawh u" a tih ve tlat si avangin, Thla eng hnuiah 20 mins. vel mual inkhawm kan nei taa, khuang 4 an vuaa, thawm chu an nei tha ve khawp mai, chhungkaw 24 rinawm takin an la Sipai chhung awih hlawma, duhawm tak an ni.
Tichuan mual inkhawm zawhah chuan kan tumna lam pan tur chuan kan tlan leh taa dar 8:45PM ah Ambanapada Corps chu kan thleng taa, an ni ho hi Sawrkar phalna a Forest ram chhunga awm an nia, engkim patta fel tak nei an ni hlawm, amaherawhchu in pakhat leh an thenawmte in chu a inhlat hlawm hlea, in auh phak chu an awm mang lo, Mizo ten ' lo fing khat dan' kan tih ang vel kardanah an awm hlawma, Corps area pakhat chhunga zau awm khawp mai.

Kan han thleng chu Corps Helper hovin min lo hmuaka, an hnam danin Halpuah ring tak takin an hala, khuang lianpui pui 3 ring tak takin an vuaa, darbenthek leh kutkhuang nen, Ngaw karah kan ri le lu mai a, an Biakin kan va thlen chuan mi an lo tam tawh hle maia, mahse 'Chaw ei hmasak phawt tur' an tih avangin, zan dar 10:20 PM ah hmanhmawh fe in inkhawm kan tan taa,a phurawm khawp mai, 'Halleluijah' tih chu a ri reng mai a, vawi khat lai chu Ring lo mi tlangval ho ten kawtah bengchheng an rawn siam hlat peka, mahse CSM leh upa dangte an tlan chhuak vata, engmah buaina dang awm tawh lovin hlim takin inkhawm chu zanlai dar 12 ah chiah kan ti tawp taa, a MAS bik khawp mai. Hei hi kan thlenni leh a zan lam programme te an la ni chauhva, a hmun hma te ropui lo in, kan mite pachhe hle mah se, Pathian chungah Chhandamna Sipai pawl hmanga a chhandamna hengho te zinga a hrilh darh duh avangin lawmthu kan nupain kan sawia, zing lam dar 2 dawnah kan mu ta.

A NI HNIHNA 24.12.2008: Nilaini zing dar 9:30 AM ah chuan BHADAR CORPS Biakin thar hawng tur chuan Vansda DHQ atang chuan kan chhuak leh taa, Khasi tlang ram ang mai, zo sang ve tak, mahse ram rem tak lawi si hi a ni deuh vek maia, moytor a tlan paha khawhawi a nuam em em vek mai. He Bhadar khua hi a awmna a sang bik khawp maia, Mizo te ang maiin tlang chhip deuh thawah an han awma, a panna kawng pawh a chho ve hlea, kan ram kawng ang maiin blacktop loh kawng a nia, kan tlan khu vung vung ve mai a ni. South Gujarat Division chhunga Corps nimahse, a nihna takah chuan NASIK DIST.Maharastra State a ni a, Sipai pawl inawpna lamah chuan South Gujarat lam mite va din leh an tana inawp a remchan zawk avangin an la tel zui ta zel a ni. Kawtchhuahah an C.O. Captain te nupa hovin a pui a nawiin min lo hmuaka, pangparthi an uar leh khawp mai bawka, tichuan CSM inah thingpui te ina kan intih harh hnu chuan an Biakin thar hawng tur chuan kan kal taa, a khua in an lo kal a ni mai awm mange, ka ti hiala, mi 300 pawl zet kan tlinga, Biakin hawn hmain Biakin tual zawl zau takah Pandal an lo kaihah chuan inkhawmna kan han nei hmasa phawta, khuang a ringa, zai a tha bawka an lam nasa ve khawp mai, inkhawm banah chuan Biakin thar chu ribbon chep chat in , Pa leh Fapa leh Thlarau Thianghlim hmingin kan hawnga, Hlanna tawngtaina kan neia, a chhungah kan luta, Nausen 4 Pathian hnenah hlanna kan nei bawka, Biakin programme kan zawh dawn lamah chuan 'chona' kan siama an rawn chhang tha hlea, ' Zahngaihna thutphah ka tum ang' ' Chair 2 ka pe ang' ' Chair 3 ka pe ang' ti te in an rawn chhang a Plastic Chair 10 chuang lai kan hmu thei ta maia a ropui hle. He lai hmun petu CSM unaupa te chhung chuan an huan hmun thalai ber mai hi an pe a nia, an pe zau tha khawp maia, sum nei sela chuan C.O. Quarters tur pawh a hmun hian a daih em em bawka an ti lawmawm hle ani. Tichuan a pui a nawiin Biakin thar lawmna ruai kan theh ta mup mupa maia a hlimawm hle mai. Tlai dar 3:30 PM ah Vansada DHQ lam panin kan hawsan leh ta a, kan haw dawna CSM te huana zun zunga ka zuk lut chuan Mizo ten kan hman ang thin 'SIKSIL' 4 lai mai ka zuk hmua, Paula ten 'Hnamtin bul hmun khat theuhin a siama' tia min lo hrilh chu ka rilruah alo luta, bulhmun khatah pawh inhnai zual deuhte chu kan lo la awm a nih hi' ka ti hial a ni.
DHQ chu tlai dar 6:20 PM ah kan thlenga, hmanhmawh tak maiin zan lama kan Christmas lawmna tur UMARKUI CORPS lam pan tura insiam zui a ngai nghala, a hahthlak char char hle mai, Kawli tihloh, Officer hmeichhe lam chuan min zui peih ta hlawm lova, a awm ka ti khawp mai. Umarkui Corps chu DHQ atangin a hla lova, 7 KM chauh a nia, kan thleng hma khawp mai, Kawtchhuahah Corps Officer te nupa hovin a pui a nawiin min lo hmuak leha, rithei an neih ang ang nen, kan ri tuar tuar maia, a hlimawm khawp mai, Kum 17 vel Corps an ni tawha tun thlengin Biakin an la nei thei lova, nikum khan chhungkaw pakhatin hmun an pea, mahse a sakna lam ala awm thei rih lo a ni. A tirah chhungkaw 35 an nia, mahse an DC hmasaah khan harsatna an tawh avangin chhungkaw 10 chuan Hindu lam an zawm leh taa, an va tui chuang si lova, a pawiin an khawngaihthlak khawp maia, tunlai hian an CO leh CSM hian laklet leh dan kawng a awm takin an tia, an tlawh fat fat renga, beiseiawm lutuk rih lo mahse an lo la let leh em ang chu. heta an CSM hi pa fel tak mai a nia, an Town ah pawh hian Co-operative Society Chairman alo ni nghe nghe a, an Hall te pawh MAS RUAI teh nan kan hmang thei a a tihzia hle.
Zan dar 8 dawn tepah inkhawm kan tana, Openair a inkhawm kan ni na vang vangin kan zai chu a ring tha khawp maia, tlangval pakhatin Christmas lawm chhung zawng atan kan Corps te chu a Sound System full set a free in a hman tira, chu chuan kan mite a tilawm hlea, kan tan tak pawh malsawmna a ni. Mizo ang deuhin tlaivar zan a ni bawka, a pui a nawia tlaivara zai tum an ni bawka dar 11:30 PM a kan hawsan tur pawh chu min ui hlawm hle maia, mahse nalktiuk lam a kan programme tur te avangin inthlahlel tak chungin kan hawsan taa, kan hun a rei lo hle na in kan thinlungah an awm reng mai dawn niin ka hria.

A NI 3-NA, CHRISTMAS NI 25. DEC. 2008: Dharampur District hi Siapi pawl tan kan ramthar a nia, nikum 2007 chhung leh kumin hian South Gujarat DC, Major Gabriel I. Christian leh a DYS, Major Dhiraj te hian mawng pawh hung hman lo khawpin Beitrual an bei char char maia, hmnalai atanga Mission dangte hlawhchham tawh thinna a nia, tunah pawh hian Vansda khawpui fem ah hian CNI ho ten Biakin mawi leh tha zet mai, Cathetdral pian ang mai hian an sa, mahse cthawktu chhungkaw thum te chuahin kum 10 aia rei an nghak tawha, member an nei thei tlat lo, South Gujarat ah hian Chhandamna Sipai Pawl chauh hi mimir ten CHRISTIAN KOHHRAN an hriat chu ala ni rih. He Division ah hian Corps 17 an awma, mahse an DC hian 2007 May thla atang a he bial ava awp hian hmasawn a tum em em maia Eng Mission mah la luh lohna DHARAMPUR DISTRICT hi a target chat maia, THQ lam mite tan pawh ' ninawm ' tih mai tur khawpin a thahnemngaihna thawm leh a report te hi hmuh tur a awm reng mai a ni.

He ti tak maia thawk nasa chu Pathianin a tanpui nasa ta hle maia, Christian la ni reng reng lo, Dharampur District chhunga ADIVASI hnam tribal khua khaw 10 ah Kohhran ava din thei taa, an vai chuan heng hnam Sipai Pawl rawn zawm tu te hi 1200 chuang lai an nia, Mizo nen kan in ang khawp maia, Sipai pawl an lawma, an zahpui miah lo, India Western Territory chhunga Sipai hnuhnungber an ni na chungin, tunah pawh hian Uniform ngaina ber leh hmangthiam ber ani tawh hialin ka hria, an tih tawh chu ti tlat mai mi an ni tih an hruaitu ten min hrilh bawk.

Kumin India ram Sipai Pawl champha 19th. September 2008 khan kan Territorial Commander, Commr. P. Mary Rajakumari leh Gujarati Officerho engemawzat te chu DHARAMPUR DISTRICT hawng tur hian THQ Mumbai atangin an kala, mahse vanduai thlak tak maiin ANAND atangin mi pakhat ( Kan hriat ruk dan chuan an DC hmasa, tuna retired tawh) hian intitsikna avang ringawtin kan ramthar rawngbawlna chu tihchhiat a tuma, RSS ho te leh BJP hotu Dharampur leh Vansada khawpuia mite hnenah telephone in alo heka, kan TC leh a thiante ho chu rawngbawlna nei thei lo tur a lo dangbet tlat tur leh, an tihluih chuan nasa taka an tawrh tir tur thu a lo vau turin a tia, a hlawhtling hlea, 19th. Sept. 2008 ni chuan kal ngaihna awm miah lovin, RSS Volunteer mi 1000 chuangin Dharampur khawpui daiah DSipai pawl hotute chu an lo chang ta renga, mahse Pathian hi a tha em em maia, chung thil chu a ruk a tih nimahse, RSS hotute zingah hian Major Gabriela leh kan Children Home te lo hmua lo hre tawhtu mi engemawzat an lo awm ve tawha, chungte chuan kan hotute engmah hrelova Dharmpur kal tumte kha an khawngaiha, Major hi an va hrilh ru ta hial a, he mi tuma Major Gabriela pawi tihzia chu, lungchhe chungin ": A tul phawt chuan Pathian leh Chhandamna Sipai pawl tan chuan Lu tan ka huam e, ka lu hi la rawh se" a ti hial a ni tiin kan Officer va kal ho te khan an sawi.

Mahse chiutiang karah chuan TC in min rawn phone a, kal lo mai turin ka lo sawipui taa, District thar chu a hmunah hawng lovin VANSDA DHQ ah TC chuan a hawng ta zawk kha a ni. Heng thil hian Major Gabriela rilru hi a ti na em em maia, chuvang chuan October thla khan THQ ah alo kala, TC emaw kei emaw Dharampura Christmas ringtharho hmanpui tur9in min rawn sawm taa, TC nen kan sawi dun hnuin keini nupa chu va hmanpui tur chuan thu kan ti tlu ta a , chu chu an hnena kan va kalna chhan bul ber pawh a ni.

Kumin Christmas Dharampurah kan hmang dawn a ni tih thu hi Anand lam atang bawkin( a hmasa a lo hektu tho kha a nih kan ringa) alo put chhuak leha, RSS leh BJP lam bawk chuan min lo er leh taa, mahse Dharampur Bawrhsap Office atangin ' Mumbai atanga in hotupa lo kal tur hian Conversion lam em ni a rawn kal chhan dawn?' tia zawhna Major Gabriela'n alo dawng hmasa taa, a nin Christmas hmanpui mai tur kan nih thu chiang takin alo hrilha, kan programme te alo hrilh tel bawka, chuti chung chuan Sawrkar thuneitu lam thenkhatte chuan min hlauhthawn pui deuhva, 23 Dec. 2008 a Vansda kan thlen atangin kan DHQ chu chhunzan zawmin Police ten kan awm chhung zawng min rawn veng ta tho thova.

Christmas ni champha zing ni chhuak engmawi tak mai hnuaiah chuan Pathian hnena lawmthu kan sawi zawhin Dharmpur khawpui lam pan tur chuan zinglam dar 10:20 AM ah Vansda atang chuan kan chhuak taa, kawng lakah engnge lo thleng ang aw, tih te pawh kan rilru chuan a ngaihtuah tel ve reng thova, mahse engmah buaina tawk lovin, Dharampur khawpui tawn tirha kan Corps pakhat AVA Corps chu kan thleng taa, an DC in alo hriattir lawk tawh angin he District a Corps 10 te atang hian mi an lo kal khawm hlawma, mahse a thente chu 25 KM aia hla te an nih hlawm avangin palai angin mi 2 te, 3 te an lo kal hlawma, kan han thleng chiah in kan hmuh hmasakber pawl chu POLICE Inspector leh a hote mi 9 leh Mei leh Thisen Puanzar khai chunga Siapi mi tam tak lo pung khawm, min lo hmuaktu te chu an ni, Poloce Officer nen pawh kan in be mai thei lawk lova, a chhan chu 'Hallelujah' tih ri chuan hun a duh reia, a ring bawka chuvang chuan a ni.
Inkhawmna tan hmain Police Officer 2 te nen chuan tha takin hlim takin thingpui no te dawm tlangin kan inkawm taa, an Sipai ten ralthuam nen min dinchilh bawka, mahse hlim takin kan kal chhan leh tihtur te kan hrilhfiah hnu chuan Inspector chuan " Buaina in tawh kan hlauva, nangmahni venghim tur che ua lo kal mai kan nih angin, in inkhawmpui chhung chu kan lo veng dawn che u a ni, kan awm reng ang' atia, keini pawh chuan Christmas lawmna Inkhawm chu hlim tak maiin kan nei taa, Pathian hi a nunga, thil a titheia, ruh leh thling leh ngaihtuahna te chena phel hrang theitu chuan, a fate chu min lo hrau chiang ngei mai, kan mitharte nen chuan he ni ropui takah hian kan hlim tak zet zeta, anmahni hmun theuhvah Christmas lawmna te an siam ve vek chungin he a District puala an 1st. Chjristmas hmanna ah hian mi 700 chuang an lo kalkhawm a nia, a ropui ngei mai, thu ka sawi laklawhlai hian Police DSP leh a hote BOLERO khatin an lo kal ve leh bawka, minute 15 vel hnuah h,mel hlim min hmuhin an kal leh taa, an ni hnuah hian Police Petrolling tum 2 an lo kal bawka, a tir a min lo dawngsawngtu Inspector leh a hote erawh kha chu an la awm zel tho bawka, tisa thuah pawh kan him hmel khawp mai.

He mi tuma kan nupa a kan pangparthi awrh hi a tam tham khawpa dar awnbawih khawpin an rawn bang an rawn bang maia, a rit em em maia, han dahchhuah then lailawk lah an remti mang bawk si lo, kan hmel pawh alang thei ta manglo hiala, chutih laia ka rilru a lo awm chu kan hla in " AMAH CHU KA TANA MAWINA ROPUI BER A LO NI " tih hla chang kha a nia, kan bulah hian Isua kha rawn awm ve hian ka hre hiala, a nuam in a hlimawm tak zet zet a ni. Corps Sergeant Major 10 Dharmpur District a mi an lo kal veka, anmahni ho te chu mipui hmaah ko chhuakin DC in alo buatsaih Christmas present Towel ka hlan theuhva, anmahniah Pathian leh Sipai pawlin beiseina sang tak neiin, rawngbawltu nihna mawhphurhna rip tak a a ni tih ka hrilha, tawngtaina ka neih saka, kan za in kan benglut niin alanga, Police ho pawh an benglut hle niin kan hria. Tichuan Christmas lawmna ruai pu kan kilho ta mup mup maia, min vengtute ho pawh kha an puar ve hmel khawp mai, inthlahlel tak chungin tlai dar 4 PM ah Dharampur a kan mithar, Christmas vawikhat hmanna a lo kal te chu "Damtakin" tiin kan kalsan ta, kan thinlungah hmun an chang thuk ta ngei mai.

Tlai dar 7:45PM ah Vansda DHQ ah Christmas Dinner tuihnai tak mai thawktute ho nen kan kilho leh taa, tunah chuan inkhawmna lam programme chu kan zo ta.

26th. Dec. 2008 Friday: Tukin chu muangmar in kan che a, dar 10 AM ah Vansda a Theium leh Juice lam an siamna hmun hmingthang tak te chu DC hovin kan va tlawh kual ve a, a hmuhnawm tur lam an siam lai vel chu an lo chawl na chungin kan mit a tlai viau tho mai. Dar 1:00 PM ah chhun chaw kan eia, muangchang lovin SAPUTARA HILL STATION tlawh turin kan chhuak leh taa, DHQ atang hian 70 KM lai a nia, a tlang a sang bawka khawvel ram alang thui bawk si, ni tla tur alang chiang em em mai bawka, kal manhla tak a ni, Christmas chawlh in ala huam avangin tlawhtu an tam em em maia, tlangsang tak chhip chu khawpui Bazar lun vanglai ang mai a ni. Kan tu ten nuam an ti unau em em maia, Ropeway ah an chuanga, hetiang reng renga fahrah dinhmuna an dinhnuah an hlim leh lawmna ni hi kan nupa in kan la hmu lova, Pathian min hruaina leh duhsakna kawngah kan thinlung a lawm tak zet zet a, Pathian leh Chhandamna Sipai Pawl chungah lawmthu kan sawi a ni. Tichuan DHQ panin kan haw leh taa, dar 10 PM rik dawn ruaiah Compound kan thleng, zanriah kan ei zui nghala, tichuan a tiuk chu kan haw ni tur alo ni ta bawka, hlim takin kan mu ta.

Tukin 27 Dec. 2008 Inrinni chu kan haw ni tur a ni taa, kan lo chhungkaw tum dan kha chuan zing dar 6:00 AM a chhuah a nia, mahse DC te nupa in an phal ta awzawng lo mai a, tichuan zing dar 8 AM ah Breakfast kan ei ho leh taa, chutah chuan Pathian hnena lawmthu sawina hun ka hmanga, kan DDWM phei chu a hnuk a ulha a lung a chhe hiala, testimony te a sawi zui ta zel a,kan Breahjfast pawh darkar khat lai kan kil ta mai awm e, tichuan inthlahlel tak leh la inlawm tak chungin dar 9:30 Am velah DC te chhungkua, DYS te chhungkua leh thawktu te ho chu kan hawsan ta, Pathian hruaina leh awmpuina in tluang takin chawhnu dar 2 PM pelh hretin Mumbai THQ chu kan thleng leh ta a ni.

CAROL TAWPZAN LEH SUNDAY 21.12.08

Nimin Pathianni 21 Dec.2008 kha Mumbai a kan Corps lian ber, Sion Tamil Corps kum 33-na champha a nia, a lawmna hi zing dar 10:30 AM ah an Biakinah urhsun taka neih a nia, Chief Guest tur a min rawn sawm avangin kan nupa in kan va kala, Major JK Tribhwan, K.E. Home Manager in min zuia, Mumbai DC Maj. Suresh Pawar te nen kan va kal hova a nuam in a hlimawm hle mai. mi 600 chuang zet kan inkhawm.

Vawiin ni 22.12.08 hian Old Age Home ah Christmas lawmna hun dar 11:30 AM ah hman leh a nia, TC Chief Guest a nia, THQ atangin Fin. Secretary leh Social Secretary (M) te nen kan va zuia, kan hlim leh khawp mai.
Chawhnu ah ka office ah Muslim Pitar 2 an lo lenga, pakhat zawk fanu chuan, a nu hnenah pawisa arawn thawna, chu a rawn thawn atang chuan a nu hian kan social work tanpui nan Rs 5000/- min rawn hlan a, a lawmawm hle mai.

ZANIN CAROL TAWP ZAN 22.12.2008 thawhtan zan: zan in hi kan Carol service tawpzan alo ni taa, mahse TC, CS, Fin. Secy. leh Social Secy(M) te chu RedShiled House ah Christmas lawmna programme ah hun kan neih hlawm avangin kan kal a tul ta mauh maia, Carol-na ah chuan kan tel ve hman ta lo a, a pawi hle mai.
RedShield Function programme chu a tha in a fel hle, Mingo an tam khawp mai, tan hnuah Mumbai buaina avanga thi chhungte puala tawngtaina hun ka hmanga, banna ka siam leh bawka, TC in Pathian thuchah a sawia, kan mingo mikhual tam zawk chu Christian an ni lo a nih a rinawm, a tawp thlengin an tel ve na chungin hla lar tak tak pawh an hre chuang lo, mahse kan hlim tlang hle.
Carol ho ten min rawn fin ta bawka kan thahnem ta hle mai, dar 10:00 PM ah kan haw ta hlawma, THQ ah zanina kan Carol sum tling khawm te ha n han chhiar leh chuan, cash in Rs 6074.00 alo tlinga, cheque pahnih ah Rs 41,150.00 alo ni bawk ne3n, zanina hmuh chhuah zawng chu Rs 46,224:00 lai alo tling a a ropui hle mai. Hlim takin buaina engmah tawk lo vin kum 2008 Carol chu kan zo ta.

CAROL ZAN 9 NA LEH THIL THENKHAT

Vawiin chanchin han sawi hmasa ila, Chhun dar 12 ah HIV/AIDS Deptt. lamin Christmas Celebration Programma an hmanga, Chief Guest atan min sawm sia, Australian sap 9 lai mai an tel ve bawk nen, chungho platform a an thut tuar mai lai sia, Chief Guest nia thu han sawi zet chu a huphurhawm dan a danglam zar mai, mahse Pathian tanpuina in ka tling tla ve thei zela, an ni ho pawh an lawm ve khawp in ka hria.

Zanin Carol chu keini nupa chuan kan thulh a ngai ta tlat mai, Tucker English Medium School in Christmas Programme an hmanna ah Chief Guest turin min rawn sawm bawka, kan nupa in tlai dar 6:30PM ah K.E. Home compound ah kan phei taa, ka beisei ai daihin mipui an lo tam maia, Tual zawl a len tehreng nen an khat hmur maia a zamawm leh ta hle mai peka, nu leh pa lan an rawn thahnem em em maia, mi zahawm hmel pui pui pawh an awma, nula tlangval lehkhathiam tih hriat reng reng hmel atam hle mai bawka, mahse Chief Guest thusawi hun alo thlen chuan Pathian tanpuina in ka tling tla ve leh ta hrama, kutbeng thawm pawh atha kher mai. Police lamin min rawn veng hneh bawka a thlamuan thlak khawp mai bawk.

Kan naute ho Carol a chhuak te ka rilruah an awm reng maia, dar 9:15 PM atangin Office ah ka lo nghak ngar ngar a, dar 10:20PM ah an lo thlenga, kan chhiar leh ta nak nak a, an rawn hlawhtling leh hle maia, avaiin Rs 13,607.00 an rawn hmua, Pathian awmpuina leh kaihhruaina kan dawng leh nasa hle mai, Pathian hnenah lawmthu awm rawh se.
Tichuan tuna kan hmuh tak zawng zawng belhkhawm chu RS 108,357.00 a ni taa, nuai kan khum ta, a lawmawm hle mai.

CAROL ZAN 8 - NA, NILAITHAWHTAN 18.12.2008

Zan in kan Carol kal tur chu ka chauh ta deuh hle a ni awm e, ka za zak lo phian ta mai, mahse ka va chhuak ve leh ta hrama, indaihloh a na phian mai sia, lohtheihlohva lo kal lo tur Advanced Christmas-na lama che tur kan nei fur maia, Ahmednagar a Junior Miss H.L. Rally na lamah Officer 5 ngawt TC in a hruai peng bawk si, Byculla zaipawl zing a mi an kal tel nual hlawm bawk si nen, zanin hi kan la tlem ber zan ala ni.

Mahse Christian veng deuh Malabar Hill lam kan hruta in 19 ngawt zanin hian kan bi tum a nia, a hahthlak khawp mai, a tir phat atangin kan phe vat vat hlawm maia, kan Sion Girls ho mawlh an khawngaihthlak ta, an zai atangkai si, keinin chawlh kan lo lak laiin kutkhuang an thin a tul bawk si, an hah bik khawp mai, an tangkai na laileng bawk nen.

Keini nupa pawh thian ten min fak der ve hlea, a nuam khawp mai "CS te nupa in min la ho zela, an ni nupa chu kal ziah thin lo sela chu, kan kal tlem thei ngawt ang, hetiang a Carol min la ho char char tu CS kan neih chhun an la ni" te min ti ru ve a nih han hriat leh chhawn chuan min ti phur ru ve tho mai, a dik chiah a ni, Carol a kal tang tang tur chuan kan upa lam ta deuh ni chuan ka hria, kawng a kham hma ta em mai.
Min ti phur zualtu pakhat chu, Pitar te mai pakhat hian, "Salvation Army kohhran chauh hi kawtthlera chanchintha hritu awm chhun kohhran an nia, Sipai pawl thawm hriat hi mitin tan malsawmna a ni fo thin" a tia, amah chu ka rin danin sap sawn a nih ka ring deuh. Chu a thusawi chuan ka rilruah, " miten sum lam min pe tam lo mahse, kan tan mite hnena chanchintha hrilna hun tha tak alo nih reng hi, phur taka kalpui zel tur kan ni" tih hi ka rilruah alo lan phah a, ka tui phah zual khawp mai.
Zan dar 10:30 PM ah THQ kan thlenga, kan han chhiar leh nak naka, zanin hian RS 13,856.00 kan lo hmu leh reng maia, a lawmawm hle mai, Pathian hnathawh ropui alo lang leh a ni. Zanin chu Christian veng lam deuh a ni bawka, nu leh naupangten min zui ve deuh dam dama a nuam danglam khawp mai.
Bombay Mizo Christian Fellowship te inkhawmna Biakin hi All Saint Church tih a nia CNI ho te Biakin kan tawm ve a nia, mahse mak tak leh duhawm deuh maiin, a hming tak aiin Mumbaia Christian tam tak ten MIZO CHURCH tiin an lo hre lar tawh zawk mah mai tih han hriat chu, a neitute lam in an haw em lovanga, rilru a ti lawm khawp mai.

CAROL ZAN 7 NA, NILAI ZAN 17.12.2008

zan in 17/12 Nilai zan kan Carol kal tur chu kan YW Hostel leh HIV/AIDS lam ten Advanced Christmas an hman avangin Officer thenkhat tel thei lo an awm ta nual maia, a ruk tak chuan a zamawm ang reng phian mai, a nihna takah chuan keini nupa pawh YW Hostel lam ten min sawm ngawrh em em maia, present pawh min pek an tum niin kan hriaa, mahse kan Carol-na lamah kan kal zawk mai loh chuan, thenkhat thla aphang dawn in kan hre sia, kan kal ta zawka, kan tifuh hle in ka hria.

Zanin chu in 9 chauh tih tur a nia, mahse a inkarkik em em hlawm maia, ke in kan kal hlawk hlawk maia, motor tlan vel atam sia, kan bitum tlem ber zan a ni na in kan hah ber zan a ni awm in ka hria. Chutih nak alai chuan in 2 in Gate a luh an phalloh avangin kan hlawhchham leh ta bawk nen, a zamawm ru fu mai. Mahse Pathian hnathawh alo lang nasa hlea, ei leh in turah te duhsakna kan dawn zan ber a ni thung tlat a, a hlimawm khawp zawk mai.

Hetiang hi kan hmu, a vaiin RS 13,873.00 kan hmua round figure kan duh leh avangin thawhbelhtu nih kan inchuh nak naka, keiin RS 20/- ka thawh belha, Captain Anil Macwan in RS 7/- a thawh belh bawka, tichuan kan hmuh zawng zawng chu zan in hian RS 13,900.00 lai alo ni ta.
Vawiin chhun dar 12 khan club pakhat in min rawn sawm bawka, Col. Kawli hovin mi 12 vel an han kala, RS 2000.00 an lo pe bawka, tichuan vawiin 17/12 akan hmuh chhuah zawng chu a vaiin RS 15,900.00 a nih tak chu, a ropui hle mai, Pathian hnathawh alo lang leh ta a ni e.

Hetiang hi Zan 7 kan Carol chhunga kan hmuh dan a ni:
Dt. 9.12.2008 Tuesday Rs 7,010.00
" 10.12. " Wed. " 10,307.50
" 11.12 " Thu. " 13,827.00
" 12.12 " Fri. " 9,829.50
" 15.12 " Mon. " 13,000.00
" 16.12 " Tue " 11,000.00
" 17.12 " Wed. (Day) 2,000.00
- do- " Wed. (Night) " 13,900.00 Total RS 80,894.50 chiah a ni, kut ruakin kan kala, Lalpan thil nasa tak min tih sak a ni.

CAROL ZAN 6 NA RECORD

Zanin dt.16.December 2008 kan Carol chu kan hah tlang ta deuh a ni phawt ang, kan chhuak khawm pawh kan mawng a rit deuh ta taih taih hlawm in a hriat. Dar 6:30 PM ah Bus ah Major Dalvi an tawngtaina a neih zawhin kan chhuak taa, tluang takin kan tum kan thleng a, zai kan tan nghal.

Mahse zan dang ang lo takin kan appeal letter pekna ngeiah si Security ten luh phal hauh lohna an nei ta nual maia, chu chuan kan zai theihna te aiin hun a duh rei zawk mah zel maia, kan dinchilha, kan sawi kan sawi kuala, an phal chuang si lova hun a hek hle, hei hian min ti hnual hman hlawm hialin ka hriaa, a pawi khawp mai.

Mahse Pathian tanpuina in kan tihtur ang ang chu kan ti zel theia, kan Cassio a ri thei lo tlat maia, kan expart hlawm bawk lo nen, kan khawih vak ngam si lova, mike erawh atha a, a hang in kan zai leh ta tho mai.

Zan dar 10:20 PM ah THQ kan thlenga Major Tribhwana ho bawkin Finance lam ten an chhiar leha, kei pawhin ka zuk tawiawm leha, RS 10,995.50 chiah kan lo hmua, kan lawm kher mai, round-up leh kan duh sia, ka lo tiam angin Rs 5.00 ka thawh belha, tichuan a vaiin zanina kan hmuh chhuah zawng zawng chu RS 11,000.50 a ni ta, a ropui hle mai, Pathian tanpuina liau liau leh bawk a ni. Kan hlim dar dar khawp mai.

CAROL ZAN 5- NA, THAWHTAN ZAN

Zan in kan Carol chu ka huphurh ang aiin kan thawk chhuak tha phian leh maia, a chhan pawh a zai thei deuh deuh pawimawh a zinbo an awm nual vang a nia, mahse midangten thahnem an rawn ngai ve leh hlauh thung maia, a lawmawm hle mai.

Zanin chu Cassio thar Carol pual liau liauva kan neih tak avangin kan phur phah hle maia, chubakah, Byculla English zaipawl member 4 an rawn tel thar bawka, kan phuisui khawp mai, kan hla hruaina thar in min chawimawi bawk nen, zan dang zawng aiin kan zai pawh a thothangin kan zai tha fe zawk bawk nen, keimahni rau rau pawh in kan hlim phah khawp mai.

Zan dar 10 PM pelh hretin THQ kan thlenga, kan nau te hovin an chhiar a, ka zuk awmpuia, pawisa faia kan hmuh zat chu, Rs 11,953.00 a nia,
Chaque in mi pakhatin min pe a " 1,000.00 a nia,
Tichuan avaiin kan hmuh zawng " 12,953.00 alo ni taa, round figure kan mamawh hle maia, ka han cho fiama, Maj. Tribhwan an" 47.00 a thawh belha, tichuan a vaiin RS 130,000.00 lai kan hmu phak ta maia, kan chunga Pathian thatna a ropuiin, mi te kaltlanga a ropuina min hmuh tir hi a hlu ngei mai.

HMU A LAWM APIANG MI VANNEI BER AN NI

Ka Blog neih thar hlima ka article pakhat "Nghilhloh nan" tih ka ziah, tibo ta daih a ka inngaih kha, Capt. Dini'n abo a ring lova, a click-na lai tur nen lam min rawn hrilha, chutiang chuan ka han ti ta ngeia, alo chhuak ta mai tak taka, ka lawm hle mai. Bible thu-in 'A tirin thu a awm' alo ti mathlawn lovin, a bul atanga thiam ho tan chuan, a tih dan tur alo awm zel maia, ral khat atang pawhin alo in kaihhruai theih tlat maia, a tihzia hle mai.

Inrinni khan kan nupa in Ahmednagar Training College ah Lecture pe tur in leh Spiritual Day ve hmanpui turin kan kala Sunday kan awm nghal bawka, kan va hlimin nuam kan ti ngei mai, Emmanuela "Kan hnena Pathian awm " kan hnenah alo awm tak tak thina chu chuan min tilawm hle a ni.
Kum 1999 a ICO ka kal khan, nikhat chu Commr. Chianghnuna te inah kava kala, ka riak nghala, a tukah kan leng chhuak tuna, sapram chu ropui ka ti hle mai tih thu ka hrilha, a ni chuan engdanga min chhang lem lo chuan, ' an sakhaw mi loh loh nen, Pathian hian ngaihtuah chiang mang hlei lo hian a duhsak phiana, duhsak tlak hi an tlemawm tehreng nen" atia, kei chuan, 'Kan Pathian hi biak thiam a awm a nih ka ringa, tin, biak fuh laklawh tawh chuan a fuh zui deuh reng tawh mai a nih ka ring, ka thianpa, Colonel Lalkiamlova pawh hian kan tleirawl tirh lai atangin a be thiam fuh laklawh tawha, an in hre tha chho viau zel maia, General pawh ala ni lovang tih sawi theih pawh a ni lo, Pathian thu thu a ni" ka tia,
Pu Chianghnuna chuan ' biakthiam chu a awm khawp ang,' a tia ka thusawi chuan a nuih te pawh a tiza lek leka, mahse biakthiam riau dan chu awm niin a ring ve niin ka hria, sapho bawk kha kan sawi kai leha, A ni chuan, Pathian hian a duhsak leka, amah ngaihsak tha duh lah hi an tlem sawt em ema, Pathianniah te hian football an pet luai luai maia, an thiltih phutawk a ngaihtuah sak tur chu ni se, an chan atha hauh bik lovang, Pathian thu in ' ka khawngaih hrim hrim dawn a ni, a tih ang maiin a duh sak hrim htrim bik a ni ' a tia, kei pawhin ka pawmpui hlea, Sapho chu Pathianin a duhsak bikah kan pawm chiang hle.

Mahse ICO a ka va haw chuan ka lehkha tur hi alo awma, ka han hawnga Ka nu min rawn thawn hi alo nia, chutah chuan kan chhungkaw chunga Pathian thatzia leh a bik taka kei lehkha pawh thiam ve si lo, Pathian leh Sipai pawl zar zo va, sapram te hial kan thleng ve chu ropui atiin lawmawm hi a ti em em maia, Bible thu hi a rawn ziak chhuaka, chu thu chu " Pathianin mi tumah duhsak bik a nei lo, hnamtina mi a ma mit hmuha dik tak leh fel taka awm apiang, alawmzawng mite an ni' tih thu Petera sawi kha a rawn sawi chhua tlat mai a, (athu hi bible thu ami ang ngau ngau chu a ni lo mai thei) Commr. Chianghnua nena kan sawi dun dan kha chuan Pathian hi mi duhsak bik nei ang khan kan chhuah deuh kha a ni sia, an hnena ka va kal leh chuan kan sawi leha, Pu Chianga chuan "Petera te pawh hi hrechiang mang vak lo hian ansawi ve bawk thin ni tur a ni" ala ti ta deuh fova, mahse ka ngaihdan ka thlak deuh ta hreta, Pathian duhsak ni tur chuan, a duhzawng tih tam hi a ni ber mai ka ti ta a ni.

CAROL ZAN 4- NA, Zirtawp zan

Vawiin dt.12.12.08 chawhnu khan kan TC pawh a pasal (Late) Commissioner Krupadas a lung phun turin Hyderabad panin a flight taa, zanin hian motorin Bapatla a pan phei nghal ang.
Zanin hi Carol zan 4 na tur alo ni taa, a huphurhawm ta hle mai, Cassio lei tura kan tirh te lahin kan lei tawk an rawn hmu mai ta si lo nen, a hang bawka zai leh a ngai dawn ta a ni.

Keini nupa lah chu naktukah Ahmednagar Training College ah Lecture leh Spiritual Day hmanpui tur a kan kal hun a ni tawh sia, inbuatsaina hun reng reng kan nei lo mai nen, zan in chu chhuty kan tul bawk sia, kan kal ta lo ringawt maia, rilru in kan inthiam lo hle mai.

Dar 10:00 PM ah kan naute an lo haw leh chiaha, Kawli a zuk chhuk vata, an rawn hlawhtling tho mai, RS 9829.50 lai an rawn hmua, thawmhnaw tlem nen, a lawmawm hle, Lalpa tanpuina leh thawh sakna avang bawk a ni.

CAROL ZAN 2-NA, DT. 10.12.2008

Nizan kan Carol leh chu kan hlim leh hle chungin kan music nei tha lo bawk kan buaipui a, mahse Pathian in min tanpuia kan kalna ten min lo dawngsawng tha leh em em hlawm a, dar 9 :30PM ah bawk kan tawp leh a, THQ lampanin kan hawng leh ta nghala, kan finance lam ten an buaipui leh nghal char chara a vaiin RS 10700/= lai kan hmua, zan hmasa kan khuma a lawmawm in a tihzia ngei mai, Pathian thlarau tanpuina liau liau a ni e.

ZAN IN, 11.12.2008 Nilaithawhtan zan CAROL report: Vawiinah Womens Ministry lam ten Picnic an neih avangin an lo haw tlai sia, kan Carol neih tur ka lungkham bawk nen, Officer thenkhat hna pawimawhah ka tir chhuak nual bawk si, Picnic lamin Office mipa an kalpui alo ngai bawk si nen, Appeal Letter sem tur, hmun hma hre deuh an vang ta hle maia, mahse senior Officer Majors Punjalal, Dalvi leh Yakub te ka tir chhuak ta ngawt maia, an senior tlang sia an zahawm hle mai, mahse phur awm takin an kala, chu chuan min ti lawm khawp mai. Major Tribhwan pawh Court lamah Nodal Officer hnen atanga Court fee stamp lei tur leh, kan Legal Adviser hnen a, tihfel ngai, kan in luahtu hnen atanga kan lak let lehna tur document Rs 200,000/- siam tur a ka tih chu, a rawn tifel nghal vek bawka, a tihzia hle, naktukah TC zin chhuah hmain Kan tenant leh a witness te kan ko vanga, kan sign tir anga, Rs 200000/- pawh draft lo siam fel diam nghal turin Fin.Secy. ka chah bawka, tih fel nghal vek tur a ni ang.

Zanin 11/12/08 kan Carol chu ka huphurh ru hle maia, mahse kan tang tlang hle mai thunga, kan Tawngtaina Pathianin min chhan sak chiang leh hle maia, dar 10:00 PM ah THQ kan thlenga, Finance lam ten an han chhiar fel meuh chuan RS 13827/- lai mai leh thawmhnaw engemaw zat kan lo hmu reng maia, a ropui hle mai.

Khawlaia kan haw lam kan tlan mek laiin, mi pakhat hian 'Salvation Army lo ding rawh u" a rawn tia, Traffict avangin din mai theih a ni lova, thui deuh kan tlan hnuin kan ding thei chauh maia, min lo ko tu pawh hmanhmawh ve fe in alo tlan pheia, Major Tribhwan a chhuka, hlauthawng ru deuh hian "Shab, hei kan Chief Secretary pawh he ta hi a thu a" atia, chupa chuan "Good Evening Sir, nizan kan veng lam in lo kal laiin kan lo awm lova, hei tlem te pawisa in bawmah thlak ve ka duha, rem lo chungin ka han au mai che u a ni" atia, kan bawm kengtu mi 4 te an chhuak a, bawm tinah chuan Rs 100/- aia tlem lo theuh a thlaka, chu chuan min ti lawm tlang hle mai.

Sion Girls Home ten an rawn thawhhlawk leh em em maia, a tihzia thin ngawt mai, naktukah kan hmuhchhuah atangin Cassio te deuh kan lei ngawt loh phei chuan, kan zai key a in mil lo thin lutuka, chu chuan keimahni leh keimahni pawh min ti beidawng lek lek thina, kumdangah pawh kan la duh zel thovanga, tiin, lei turin kan nau te ho pawh ka han hnem ta ngawt mai a, an lawm dar dar khawp mai. Zan dar 11 PM chiah a ni taa, ka thil chhinchhiah duh te ka zo ta e.

MIN NGAIDAM RAWH U, RS 7010/- a ni e.

KaPu, Kapa Pa, hi Zathuama CSM Biate Corps a mi a nia, vawikhat chu Bible a chhiar thiam tirh lam hian "Sanghawngsei hriau beng a luh tlang" thu kha Pu Khualiana te nen an chhiara, ka Pu khan Bible a chuang mah ni se, awih har a ti hle ni tur a ni, " A, Khualian, a ni thei lovang, Luka te hian Isua thu sawi hi an hre sual a ni ang, Sanghawngsei benga Hriau luh tlang a awlsam zawk ang, chutiang lam chuan a sawi anga, Luka te hi a hnung lam deuhvah an thu anga, an hre letling a ni ang" ti khan a ngaihdan a siam a, mahse a ni ngaihdan atanga lak tur ni si hek lo, tun thleng hian a nih ngai in ala ni ta renga, tihsual leh ngaihsual te hi chu a awm khawp mai.

Kei pawh nizan a kan Carol pawisa hmuh hi ka ziak sual duai maia, RS 7010/= tih ka tumin Rs 70100/= ka han tih daih a nih hi, min ngaidam rawh u, ka tih fo thin hi, tlem chuan kan lo afternoon ta deuh chu a ni ang.

NIZAN KAN CAROL ZET CHU E

kUMIN 2008 Mumbai THQ Christmas Carol zet chu a buaithlak danglamin, thahnemngaih a na zek mai. Terrorist ho ten 26 November a Taj Hotel leh hmun dangte an rawn beih avang khan kan kumtin Carol Service neih thin chu kan rinloh takin min ti buai thawthang chu a ni ta mai a.Khawpui lianah chuan Carol neih te hi ahma fe a thuneitute atanga phalna laklawk a ngai thin renga, mahse kumin chu 8th. December zan atanga neih tan tur a kan ruahman chu, thuneitute tawngkam tha hmu reng chung si in phalna kan hmu mai lo tlat maia, phalna tel lova han tih ngawt lah kan ngam bawk si lo, mahse Pathian tanpuina a zarah 9th.Dec. zan atanga tan turin chawpchilh deuh maiin phalna kan hmu taa, chu pawh chu 6 to 10 PM tih a nia, dar 9:30PM hnuah chuan tihzui lohva haw tur a ni mai sia, a buaithlak hle dawn mai.

Tichuan nizan, 9th.Dec.2008 tlaiah chuan a kal thei tur tur te chu THQ kawtah kan han inhawrkhawma, 6:00 PM ah chuan tawngtaina ka neih zawhin Bus ah kan lut taa, mahse a buaithlak ta ber mai chu; Pu C.Ngura'n, R.Zuala te Carol a sawi ang deuhin, ni tlak hmaa "Zantiang reh, lai takin" tih sak te a tul ve dawn ta maia, ni tlak kan han nghah thlen meuh chuan 7 PM alo ni der maia, hun kan nei tawi hle mai, kan Bus hire-na man zat poh kan hmu chhuak hman lo mai ang tih hlauhawm tak a ni.

Buaina kan neih leh tak pakhat chu, nizana kan Carol na tur veng hi Malabar Hill ah a nia, inchhawng a sang hlawm fu maia, chhawng 7 atanga chhawng 22 te an ni deuh thluah maia, chutah, kan Bandpute ho lah pakhat mah rawn thawk chhuak thei an awm hman si lo, company a thawk an ni vek a, darkar bi a hun nei an bawk nen, Sion Girls Home atangin nula tleirawl 13 leh an Home Mother an lo kala, Kutkhuang an rawn kenga, Tape Recoder lian lo tak nen, Mipa lamah Tingtang perh thiam kan awmloh avangin kan keng bawk hek lo. Mizorama kan Carol kha aang lova, mi compound a kan luh dawn khan an Security duty ho an lo fet em em zela, Building hnaih theih poh a ni lova, tualzawlah, openair a kan han zai ta a nih chu, a ring mawh ngei mai.

Kan zai chu Maharastra TYS leh Financial Secretary ten min hruaia, hla key han zawn pawh a awm chuang lova " one, two, three " an han tia, mahni key mil tawk tawkin kan han bei ta mai thina, a ruk tak chuan ka mang a ang hle mai, boruak thawleng a zai kan ni bawka, kan aw lah a ring thei na hek lo kan kutkhuang ri te lah chu phelsep rual taka vuak ang thep thep mai a ni lek si, kan information athat avang chauhvin, Ground leh 1st. floor a mi ten min hre thei a, hahthlak tak a ni.
Ka mang a ang lutuk thu a ni ber e, kei englaimaha zaipawl la kaihruai ngai miah lo, miten solfa thiam an tih poh hlawh ngai lo, hlawh tur pawh a thiam bawk si lo, mi rual a lo rum thum ve mai mai thin khan, ni ngang a ka hriat loh avangin ka han hruai ta a nih reuh chu: ka han rum ru deuh veng venga, chutah hla key dik tawk ni a ka hriat kha ka han rum rin pui taa, " Hark the herald angels sing" Joy to the World, OCome, all ye faithful, ONCE, in royal David's city tih te Silent night, holy night, leh a dang te pawh kan sa tha ve ta fu maia, a hah erawhchu ka hah tak zet maia, one two three han tih mai ai kha chuan a tha ta zawk fu in kan hre veka, chu ta tang chuan " CS in hla hruai a thiam" an ti sap sap maia, kan Nu erawh chuan ka zah a hlau deuh a ni ang, min melh tha duh vak lo.

Tichuan dar 9:30 PM alo ni ta mai sia, kan haw a hun taa, Major K.K. Parmar, Feild Secretary {Gujarat) in tawngtaina a neia, kan Bus dinna lamah kan kala, kan haw zui taa, THQ kan thlen chuan kan hmuh ang ang, Bawma lo tla lut te chu kan nauten an han chhiar fela, Rs 70100= lai alo tling maia, a lawmawm hle mai, kan zaithiam leh tih thata hlawh chhuah tur ni se, ka rindan tak chuan RS 100/- pawh kan hmuh phak ka ring lo, Tawngtaina chhangtu Pathianin a fate ho inpekna tlinglo tak mal a sawma, mite thinlunga thu alo sawi hmasak vang vek a ni tih ka hriatchian em avangin ka lawm tak tak a ni. Zan dangah chuan Band tel thei hram se ka tia, tukin chu ka pharbuai hle na in, kan peon Prakasha Pa, THQ a kum tak tak peon alo thawk tawh chu, nimin tlai khan lungphuchawl in a thi hlawuh maia, chu chuan vawiin poh mitthi vui buaiin kan buaia, tlai lam chu eng tak ang ang i maw, Lalpan min puih leh ngei ka ringa ka beisei bawk. Kan kumkhaw sawi a tling mai thei a ni.

BETHLEHEM ARSI A ENG LEH TA

Lal pian hun pangpar a vul leh ta,
Thinlai mu hnu lunglen a kai tho ve.

han tih te leh

Karhla a leng rual duh zawngte,
In dam lai em ni le, Kristmas ni lawmawm
A lo eng leh ta.

han tih te hian, ka thinlung a fan thar leh thina, chutih rual rual chuan, kan Pathian, Pathian inthup thei tak mai, hla in "Lei lung pian laia talh tawh Beramno" ti meuhva alo sawi leh, Eden huana Promised ni tawh bawk si, kum tam tak ral hnua, Chhandamtu a rawn tirh dan hi, ka ngaihtuah ka ngaihtuah a, heti tak maia Pathianin ama siamte ngei mai a hawisan chhung leh Pathian lo va an awm chhung rei lutuk tak mai hi, Tlanna buatsaih hi a tan pawh hian a harsa ngang chu a ni ang maw, hun a duh rei em mai, tih te ka ngaihtuaha, engpawhnise, Pathian meuh anchhia dawngtute tlanna atan chuan, amah Pathian pawh hian a duhthusama tha leh tling hi a hmu lawk lo pawh a ni thei ang, a hmu zo ta ngang lo anga, tlan ngei hun a ti tawh bawk si anga, ui chung chungin afapa mal neih chhun hi min pe ta mai a ni ngei tur a ni, ngaituahpui ta ila, Khawvel sual zawng zawng atang tlan chhuak tur chuan SUAL NEI LO a ni ngei tur a ni si, chuti a nih avang chuan lohtheihlohin ISUA min pek hi a ngai tlat a, kan Pathian tan tak pawh hian thutlukna siam hi avan harsa dawn em, A fapa tan tak pawh hian ' engkim kalsan vek a, thilsiam te zinga tuar tur ngawt mai alo kal chu, ava namai lo em, ngaihtuah nasat poh leh kan chhandamna buatsaih dan lo khirh zia leh a man tam zia hi kan hre thei anga, mahse kan chhut chhuak thei chuang si lovang, avan ril em, ava thuk em, Pu Chawngkhupa'n

Aw, min hrilh rawh thukna ropui,
Ranthleng leh thing anchhe dawng leh
Vana lallukhum a inzawm,
Lei Eden leh Salem thar nen.

tia alo phuah chhuak hian, Pathian mihring a alo channa thuah a tum a sawi chianga, a kawng khirh, leh sei zia,Bawhchhiatna hmu lei Eden leh Van Salem inthlunzawmna, chan phaklo Vana Lallukhum kan ta tur nen lama buatsaih thlengin min hrilhfiah saka, he hla hi a rilin a hlu hle mai.

Pathian tana tlanna buatsaih harsat dan tur leh khirh zia tur chu kan suangtuah phak tak tak lo, kan chanvo ropui dan poh kan chhut chhuak thiam kim na hek lo, chutichung chuan, Nula leh Tlangval in ngaizawng mek MARI leh JOSEPHA te chungchang hi a khirh chu ka tihpui ve ngawt mai, fak pawh an phu em em mai, mahse keini Protestant ho hi chu kan intih thlarau mi vang nge, fak ta nge kan ti mang hek lo, ka chunga tla ni ta se kei hian ka hrethiam a ngem aw, ka hriat thiam ka inring lo tlat mai.
Mari kha chu Bible History atang te,Zawlnei te thu sawi atangte khan Nula Thianghlim lakah Pathian fapa alo la piang dawn a ni tih, alo tlang thang huai huai tawha, ti ti ah chuan,rei tak tawh ata Juda nula te chuan Pathian fapa paitu nih an lo tumin an lo inbeisei fo tawh thin a ni an ti. Chutiang te a nih chuan, Mari pawh hi hmeltha tawk, nungchang tha leh fel a ni sia, alo inbeisei ru ve thin poh a ni mai thei, chuvangin " Vantirhkoh lo kal thut hian a barakhaih a nih pawhin" a awma, mahse a thu ken erawh hi chuan a ti lawm in mak lutuk takah phei chuan a ngaiha rinawm lem loh, mahse a hamhaih nasa hle ang chu, chubakah Vantirhkoh khan(Luka 1:35 ah) "Chungnungbera thiultihtheihna in a hliahkhuh ang che" ala ti ta lehnghala, huphurhai chuan a phurawm ta fu zawk awm e.


Mahse keini lam thianpa ve thung, Tv. Josepha chan ve thung hi a ni, ngaihtuah ngai nasa chu ni, Nazareth nula hmeltha ber nen an in ngaizawnga, an kalthui tawh hlea, chhungte hriatpuina in engegement pawh an ti fel thlap tawha man an la khung lo chauh a ni tawha, hetih hunlai hian Tv.Josepha hi lo thi ta thut pawhnise, Mari hi pasal sun anga ngaih tur a ni ve tawha, chutiang khawpa inpumkhat chu an lo ni tawha, an la tih loh chu Bible in min hrilh ang hian' an lo la inpawl lo hlau zawk a ni". Chutiang dinhmuna an din laia, Mari 'a rai' tih miten an lo hre ta huai huai mai kha chu tlangval a pumpa, mahni nupui hual te han rai ta mauh mai chu "tu fa nge a pai ang, min lo va bum thui em em ve' tia, thinrim leh zah fawmkem na ngei tur chi a ni, mahse a zanah khan mumang mak tak mai alo nei taa, Mizo chuan " a a ngaihtuah nasa bawka a mangphan a ni" an ti anga, Vantirhkoh lam alang phak lo mai thei a ni.

Mahse Josepha zawng mi danglam deuh hi a ni reng renga, a mumang chu a pawm hmiah maia, hei tak hi a ni, kan tluk lohna tur ni a ka rin chu ni, a hun lai han ngaihtuah hian " thlasik mumang mai mai" te pawh a tih theih hun lai a nih duh hmel viau lehnghala, Vantirhkoh hian hliahkhuh a nih ve tur pawh a hrilh ve mang bawk si lo, a hel tuar tang tang mai ni tur a nia, a duh ber leh nupui atana a hual, neih thuai thuai alo hisap ran ran, a rai ta luah mai si, a chhungte leh laina thian tha ten 'engtintak sawi ang maw" zahpui tawk, deu tawk, hmusit tawk chu a duh aia tam mah a hmu mai awm e.

Mahse Pathian thu hi a maka, a ringtu te hnenah hian kan tum loh leh rinloh ang tak tak hian thil hi alo thleng dawn alo ni renga, chutah chiah chuan a ni "hmuhtheihloh hmutute" an lo danglam thin dawn ni.

Kumin Krismas kan lawm dawn mek lai hian, kan hnenah Lalpa thlarau hian engnge a sawi ve le, kan lo beisei ruk te em ni a sawia, kan rin reng reng loh leh a ngaihna pawh kan hriat ngai hau loh tur te le?

Kumin Krismas bak hi he khawvelah hian la hman leh i in beisei em? Kristmas leh Kumthar 2009 chibai vek ule.

CHAWHCHAWRAWI

HMAN ZAN khan "khawinge ka naupan lai khan naupang a pawl taka sawi ka ni thin bawka, ka naupan zual lai, kan kawmthlangpa inawkhlum ka enhlum thak mai lai leh, Indopui pahnihna laia, Sipaiho trench khur hluia Rifle mu, mu 5 lai ka chhar, eng a nih hre lova chemte atana chher ka tum avanga thuk a ka rawh puah, ka thih phah teuh zia te kha, ka'n ziak mai mai teh ang" ka tia, ka ziak ta teuh maia, mahse ka thiam a chiang leh ta lo thuta, ka thawnbo ta ni tur a ni, ka hnenah lah alo let leh ta hek lo, ka ui hle mai.
Ka theihtawpa ka zawn pawhin ka hmu zo ta lo, Kan IS leh Dini'n min fuihpawrh a ka phur turh turh nen, Chhura Aium tibo chu nep te ka ni ta mai. Tunah pawh hei ka chhut mawlh mawlh lai hian ka Laptop hian music a play reng maia, khawia tihtawp chi nge maw ni dawn ni, Daniel Edison awm si lo, Danny-a awm bawk si lo, ka PS chhuty bawk si, Zoram Election result ngaihthlak nen a inhmeh ang reng phian mai. Tunah hian India National Congress Lalthanhawla hruaiten seat 21 an la tawha, sawrkarna an chang dawn ta. MNF in seat 4, UDA in seat 1, chu chu ka hriat ala nia, Pu ZoramSangliana atlinga ka lawm em em mai, Minister a ni leh ngei turah ka ngai hmiah.

Pa Fela hian Chhawrtui khaw thlalak min han hlui thina, hei hian lung hlui hlui a tilenga, a hming ang mai hian fel ka ti thar thin, Chhawrtui khua chu khaw hmun nuam leh rem tak zawng a ni lo, a mi chengte an nuama,khua hi fiamthu thianghlimin a luah hneh em em a, nula leh tlangval te tan zan thla te hi a eng bik thin ni awmin an sawi. Kan naupan na hmun, chhungkaw kima kan khawsakna, kan tleirawlna hmun, keimah ang bawka thian mawl ve tak tak te nen a khawvel dang ai pawha nuam zawk a kan hriat leh tleirawl te pawh kha khawdang a mite ai chuan hmeltha zawk fe a kan hriatna hmun, lungawina khua, tui kang nghah a ngai, mahse chu chu a nawmna a awm, Christmas lengkhawm tlaivar tuk zingah, mahni tum tawk te te te nen, chhang khawn te kha a nuam a sin, an in ah kan la leng ngam chiah si lo, mahse len ngam hnu ai khan a lo nuam fe zawka.
Football kan ching tan, kan khaw tleirawlah chuan Goal venthiam a sawi ka ni, mahse ka chhung ten min rawn en ve chuan ka ti tha duh tlat lo, uang lo ang reng tak chu ka ni.
Nichin khan kan Pu ber in "Zoram tang fan fan" tih a ziah chhunzawmna kha ka chhiara, ka rilru a var huai maia, kei pawh hian khelmual tur hi ka lo ngaihtuah ve fo tawh thina, ka rilru hian ram rem lai awm hi a dap a dap maia, kan pu han sawi atang hian " Kawrh kapa RCC a khelmual tur ruahmana, a chungah lei tha feet 3 aia chhah maha chhun khan, khelmual tha lutuk tur Aizawlah hian kan siam thei" tih ka hmu chhuak ve in ka inhriaa, kha a thu ziak kha, A BU IN CHHUAK VAT RAWH SE< SAWRKAR THAR APIANG DAWN MEKA ATANGKAI ANG tih hi ka han tuihnihna a ni.

Nghilhloh nan

Ka blog neih ve chhun te hi tuna ka han khawih leh loh chuan, zanah ka muthilh hlanin ka theihnghilh leh mai ang tih ka hlau va, chuvang chuan peih vak lo chungin ka mitthlaa ala cham lai hian tul lem hlei lo pawh ka zuk ziak mai mai teh ang tiin, office ah ka lut leh ta teh poh a, miten maimitchhing khawngkhawbai chung pawha in lo thiam nal em em tawh pawh nise, kei atan zawng ruah tham loh thil thar ala nia, ala hlu a ni, chuvangin ka naupan lai chanchin theihnghilh ka duh em em, mahse ka hriat reng si thenkhat kan ziak chhuak teh mai ang, a bul retah tan lovin.

Kum 1954 fur lai tak mai hian Zuchhip Corps atangin Teikhang Corps lamah kan sap Brigr. Marry a pui khan kapa a sawn nulh maia, khanglai khan hotute thupek awihna kawngah khan an la tha em em hlawma, a hmun thleng tur a an tih ni a thleng hman ngei turin Zuchhip khua atang chuan puakphur te nen kan chhuak taa, kei puak ngai, ka nau kal thei tir chauh la ni bawk, Kapatea te, kan makpa te, ka ni te ho Biate atangin an lo kal bawka, kan mite ho inthlah thawm tap ri karah kan chhuak taa, thui pawh kan kal hma atangin ruah a sur nghal ta mai renga, nitin a ruah do zel chungin a ni 4 ni ah Teikhang khua chu kan thleng taa, ka tawngthiam ve chhun Mizo tawng leh Pawi tawng te chu alo hman theih ta reng reng loh maia, naupang te e ti lovin ka lung a leng thei hle thin mai.

Mahse tawng chu ka thiam thuaia, kum 1956 kum atang phei kha chuan ka nu leh pa ten Mizotawng a min biak pawhin Paite tawng ngatin ka chhang tawh thin a, mikhual pawhin Lusei naupang ka nih an hrethei mai chuang lo. 1956 kum hian School ka lut ve tana, in lamah ka nu in A AW B min zirtir thiam sa veka, ka hreh chung chung ka pa in phelsep kengin skul min um thleng a ni ber mai.

Ka kal tan ni chuan chawhma chawlh lawk thleng chuan ka zakzum ve viau va, mahse chhun chawlh hnua chawhnu kan han kal leh chu ka tlangnel ta hle maia, ka hla lo thiam sa kan saa, kan khaw naupang sikul lut zawng zawng kha zitirtu pakhat in min ho a nia, keini lut tir ho zirtirtiu ber te chu pawl thum fel zual deuh te kha an ni mai. Kan han zai ta mai tak taka, kan hla sak chu



Sikul ka luh tirhin, mikhual ang ka lo ni

Ka pawl min siam sakin ka hming an han ziaka

Mak ti awm fahranin 'A' ka han ti phawta

Lungleng awm tak mai in 'AW' ka han tih chu;

'B' ka han sa taa, chhawn tur van vei vei nen'

Ban hma loh phei chuan 'CH' ka lam ka lam thin;

Ei tak tak si lovin 'D' hmun ka thleng thin.

kan sa zel kan sa zela,'P' ka lam apiangin ka Pu pawh ka hre thin........

Khuai lam te pawh zirin 'V' ka ti va va thin..... ka lung ati leng thina, Shillong Corps a kan awmlaiin, Biakin thar lawmna tur sum tuak nan All India Radio ah he hla hi Shillong Corps khan Pu B.Thanmawia zarah kan record ve thlap zu nia.



Nikhat chu ka thainpa Ruata nen Sikul kan thulha,ka Nu in ' i ninhlei si leng teh, nau pawh a mu thei lo' tiin min hauva, Ruata te ina leng tur chuan ka chhuak taa, Ruata pa hian luhkapuiah hruikhau alo herha, ka awt hle maia ' Kapu i hrui khau herh hi kan Bawngte chaih nan min pe phal a ngem?' ka ti ngawt maia, a ni lah chuan 'E, phal e, i nu han dil tawh, a phal chuan Ruata nen in Bawngte chu in chaih dawn nia, ' atia, phur fe in ka nu dil tur chuan ka kal taa, kan inhnuai atangin ka nu chu ka ko va ' rawn bengchheng suh, phal phal, kal vat rawh' atia lawm takin ka tlan leta, Ruata pa hnenah chuan ka nu in aphal thu ka sawia, a ni chuan " tah khan lo awm ula, ka va pawt mar lawk a nge,' atia in chhungah a luta, kan rinaia alo chhuah har tak avang chuan kan lut ve taa, Ruata pa chu le, an Buh zem chung zawnah a hrui herh ngei mai khan a nghawngah inhlingin alo inkhai a, alo tal map map mai a, chutia kan va lan sia avang khan, naupang hmuh laia harhfim tak chung sia tih luih zel chu a duh lo a ni ang, Zem tlang a rap a, khur zawih zawih chuan a ding taa, ' a mar tha tawh khawp e' atia, hrui chu lak mai ka tuma mahse la la rih suh ' hmabak tlem ala awm' a tia, chaw tlang min pea, sa rep hi thukah rei lo te a thawlh thawt thawta chi min al saka, ' hei pawnah lo va ei lawk rawh u, in ei kham ve leh Rama te in lamah hrui nen in chho dawn nia' atia, keini pawh pawnah kan chhuak taa, thingphur hawn em pawh ala hun si lova, ril atam hman lova, chaw tlang chu kan paiha sarep chu kan thial tawlh tawlh a, kan lut leh ta maia, Ruata pa chu kan hmuh mai loh avangin Buh zem lam bawk chu kan va pan pheia, a hma a a tih dan ang chiah chiah khan alo inawk leh taa, alo vir mai mai maia, a mit te hi rawn pawng deuh zawrh zawrh hian ka hmua, Ruata nen chuan kan en reng maia, a puanven a rawn tlaa, kan ngaih pawh atha lo chuang lem hlei lova, mahse hrui chu kan la thei dawn lo tih kan hriaa, muangchangin kan in lamah kan chhova, in kan thlen chuan ka nu hnenah " Ruata Pa a nghawngah a inhlinga a then vir mawi mawi mai, apuanven atlaa, a kawhte pawh alang vek, kan koh pawhin min chhang duh lo vei a, kan lo chho daih" te kan ti mai maia, ka Nu ngaih a tha ta lo, ' kal rawh u, i zuk en angu' a tia min chhuk pui leha, mahse kan zui tha duh mang bar lova, ka nu chu ava luta, rang tak hian alo chhuaka min tir zui nghala "rang takin Zirtirpa sikulah zuk ko vat rawh u, tlan rawhu, hei hmanhmawh a ngai a nih hi, puitling in awm dang kan hre si lo" atia, keini lah sephung vung tha deuh kan hmuh hlawm avangin muangchangin kan kala, sikul kan thlen tak pawh ka hre lo, mahse Ruata u, kum 12 vela upa, u Thangtawna insu hi alo haw a, chu nen chuan ka nu chuan Ruata pa chu an hlang thla ta alo ni awm e.

Mission ho lah chuan, "Mahni inthat a nia, kohhran dan in kan vui thiang lo" an ti tlat mai sia,Kapa Aizawl kal lo haw ni tur a nia, Ngopa atangin alo haw a, tlai takah an vui ta nghe nghe a.He thil hi ka hrereng maia ka theihnghilh dawn tawh lo a nih ka ring, naupang fing kerkawr chi chu ni ila zawng Ruata pa kha a inawkhlum kher lo mai thei a ni, mahse kan lo ni si lo.

THU THAR

Rawngbawlpui duh tak te u, engtintinemaw ka ti kual ka ti kual a, Mr. Daniel Edison alo kal remchang bawka, min han tihpui zung zunga, heti hi ka tlin chho ta. Hmanni khan Dinni'n a zia rang chu min han hrilh thuaka, mahse thluak hi a vir muang tawh deuh hleka, a chang leh a vir let leh thu ni te hian ka hriaa, niminah IS nen Blog thu kan sawi duna, min han tanpui bawka, rinloh tak si, tum ang lawi bawk siin, ka ti ka tia, IS blog ka hawng mial maia, tukinah a click leh dan tur te min han hrilh leha, mak takin Chiahpuam tih te, Dini article zei tak mai te, Israel ram hmun hrang hrang fan thu te ka lo chhiar ve thei ta, hei ka han siam ve chhina ka blog hi tlawh man a hla kher rih lovang, mahse in lo len duh chang a awm takin, http.//gateway-rama.blogspot.com ka han ti ve raih a ni, ka email kha Lalramhluna @iwt.Salvationarmy.org a ni tih inlo theihnghilh a nih takin, mail ka hmu tha lo ema ka han sawi tel a ni. Tukinah IS in min han fuih a tangkai khawp mai, kei hi chu naupan lai atanga fakpawrh theih deuh mai, fuih chi tak mai ka nia, tar thlenga ka chhawm tur a nih hmel khawp mai, Kan Pu article ho hi belhchian a dawl hle maia, inthlan zawh hnua tangkai tur a tam hle in ka ringa, chu zawk chu kan ram mamawh a nih poh ka ring zawk, a bu a chhuah a nghahhlelh awm hle.
Mumbai buainaah khan, 27/11 khan officer thenkhat hruai khan Police hotute phalna khan kan Redshield leh Taj Hotel lam kha kan va kal kha a nia, a ralti hlea, mahse kan va kal tuk atang khan la inkap zeuh zeuh mahse, kan va fuihna a zarah Redshield thawktuten Sipai leh Police leh Chanchinbu mite ho hnenah refereshment an lo sem theih phaha, an lo mamawh ngiang tawh bawk si nen, Sipai pawl chungah venghimtute an lawm hle, thlalak dahthiam ilang chuan ka rawn telh tur hi a ni a, ka thiam si lova, pi leh pu ber te report ah ka thawn tir anga, an nin min lo luanchhuah sak chuan in lo la hmu ang.
Mumbai buaina chhuahna hmun lai, Taj Hotelah Mizo 6 hnathawk an awma, Oberoi Hotelah 7 an awm bawka, an vaiin an him vek, midang chin hriatloh a awm te poh an lo him vek hlawm. Tun atan chuan hei hi ka thu thar ni teh se, ka rawn chhunzawm thiam em ang chu maw. Damtakin chibai mangtha vek ule. In thian Rama